ووقفيتنى مشعر ظهرلرنده مختوم * وقف مهريله ممهور * وأسامئ ساميلرى معنون ومرسوم * ومدوّن ومختوم * دفتر مسطور صحّت نصابلريمي * نيت صافيه * وطويت وافيه ايله * طلباً لمرضاة الله الجليل * وقف وتسبيل ايليوب * ودار السلطنة العلية قسطنطينية المحمية * صانها الله الحفيظ عن الآفات والبلية * وأفاض على سكانه سجاياه السنية * محلاتندن: لاله لي چشمه قربنده نفس قوصقه ده نشانجي كمال الدين * محله سنده كائن أطراف أربعه دن دفتردار أسبق مرحوم خليل أفندي زوده سي منزللري وطريق خاص ومحمد پاشا كريمه سي رقيّة خانم باغچه سي وسابقاً باروتخانه ناظري أحمد أفندي منزلي وطريق عام وطريق خاص ورقيّة خاتون مشروطه منزلي وسابقا شهر أميني محمد أفندي منزلي وطريق جاده ايله محدود بحساب تربيعي بش بيك درتيوز يدي [5407] ذراع محاط حيطهء ملكيت صحيحة م اولان عرصه يي * وعرصه مذكوره نك بر قطعه سنه خزانهء كُتُب موقوفة أولمق اوزره دستيارئ توفيق باري إيله بنا ايلديكم كُتُبخانه فيض آشيانه يي * وينه عرصهء مرقومه نك قطعهء أُخراسنه طرح وانشا ايلديكم مكتب مطبوع البنيان * ومشيد الأركاني * وينه عرصهء مرقومه داخلنده حافظ كُتب اولان كمسنه لر على طريق المشاركة ساكن اولملريچون بنا ايلديكم كبير وصغير ايكي باب كاركير اوطه ودهليزي ودورت عدد كنيفي * ... طُراًّ وقاطبةً حِسبةً لله الفرد الصمد * وطلباً لمرضاة الملك الأحد * وقف صحيح مؤبّد * وحبس صريح مُخلّد ايله وقف وحبس ايدوب * ... كتب موقوفة بجملتها وضع اولنوب على طريق الاستنساخ والاستعارة هيچ بر قطعة سي كتبخانة دن اخراج وبر فرده اعاره اولنميوب * مطالعة وانتفاعي آنجق كتبخانة يه مخصوص ومقصورقلنه * وكلوب مطالعة ايله استفادة واستكتاب ومقابله ارادة ايدن طلبة علوم ومعارف * انتفاعندن بر درلو منع وصرف اولنميوب* ...