محمود وأحمد وخالد النوادري، صالح الرملي ونايف عيسات. إسرائيل رحّلت معظم أهل عشيرة المواسي إلى سوريا واللي بقيو بالبلاد سكنوا في عيلبون.

الرحيل:

وتستمر رضية عيد في انتشال ما تبقى من ذكرياتها:

لما وصلنا المغار كانت المغار مستسلمة، ورافعين بيارق بيضا، قالوا لنا كمّلوا طريقكم. كملنا على كفر عنان، بس أهل البلد ما استقبلونا ولا أعطونا لا ميّ ولا أكل لأنهم كانوا خايفين من اليهود. وقعدنا تحت المَلّة، هاي شجرة كبيرة موجودة لليوم عند كفر عنان. بكفر عنان أجا الجنود اليهود ورموا لنا بطاطا مسلوقة على الشارع، كانت الأولاد تريّل من الجوع والعطش، هجمت الناس على البطاطا وفجأة صاروا اليهود يطخوا عليهم. بهاي الحادثة انقتل سمعان الشوفاني الله يرحمه. لما صار الطخّ حطيت ابني يوسف تحتي ونمت عليه، جنبي كانت مرأه من كفرعنان نامت على ولدها تحميه، أجت فيها رصاصة وإنقتلت. بعد شوي قالوا لنا الجيش إنه هذا الطخّ كان بالغلط.

ويضيف أبو عاطف قائلاً:

وإحنا بقرية فراضه، أجا جيش اليهود ووقفوا الزلام لحال والنسوان لحال. أخذوا المصاري من كل الزلام. وبعدها قالوا بدنا كمان خمسين ليرة واذا ما بتعطونا راح نطخ عشر شباب. صارت الختيارية تتشاور مع بعضها، في واحد اسمه ابراهيم الحوّا، هذا كان عنده دكانة، نأدى على مرته، قال لها إذا معك خمسين ليرة بنشتري فيهن عشر زلام من عيلبون. اعطته المصاري وراح الجنود. الناس نامت بالشوارع بفراضة. ثاني يوم أجو اليهود وجمعوا أهل البلد، أخذوا 55 زلمة، وكمان اثنين شباب صغار، هنّ أديب حنا وعفيف ميخائيل، أخذوهم وحطوهم بالمعتقل حوالي 6 - 7 أشهر.