احنا وأهل فراضة وكفرعنان طلعنا على لبنان. طلعنا على رميش ومن هناك شرّقنا على يارون عند قرايبنا، بعدين رحنا على عين إبل، استقبلونا ووقت الأكل كانوا شبابهم يدوروا ويجيبوا أكل لكل البلد. بعد جمعة بعثونا على مخيم الميّة وميّة عند صيدا. قسم من أهل عيلبون كانت بالمخيم وقسم راح عند أقاربه بلبنان وقسم راح سكن بالأديرة.

العودة:

وصلت أنباء المجزرة إلى الحكومات الأوروبية والأمم المتحدة التي ضغطت على إسرائيل وأجبرتها على إعادة أعالي عيلبون إلى قريتهم.

أبوي رجع على عيلبون بشهر 12 وبشهر 2 أجا على لبنان ورجّع معه أمي وأختي، حدّثنا أبو عاطف، واكمل:

أنا ظليت لحالي وما كنت عارف انه أخوي انقتل. بعد حوالي شهر ونص، وبعد ما اطمأنوا إنه اليهود بطلوا يقتلوا ناس أجا أبوي أخذني على عيلبون. لما رجعت أجوا ناس لعندنا على البيت وأجا شاب وقال لي سلامة راسك وساعتها عرفت عن ميلاد. أنا شفت لما اختاروا الشباب لما كنا هون، بس ما عرفت شو عملوا فيهن بعد هيك.

بدينا حياتنا من جديد. ما كان معنا ولا قرش يومها. راح أبوي عند قرايبنا من سخنين وطلب مساعدة. لما رجع أبوي على عيلبون لاقى البيت فاضي والبيوت منهوبه، حتى البقر والمعزة مش موجودين. صارت الحياة صعبة. صادروا أراضينا والأمم المتحدة صارت تطلع لنا مؤن باول سنة. بعدها أجو اليهود واقترحوا على الناس انه تضمن أرضها، الدونم بقرش، الناس رفضت توقّع، لأنه إذا الناس وقّعت كأنها اعترفت إنه الأرض هي أرض غائبين وصارت للدولة واحنا بس بنضمنها. وبعد مدة نجحنا انه نرجع الأرض كلها لأصحابها.

----------