في 2 تشرين ثاني، ارتكب الجنود الإسرائيليون مجزرة أخرى على أرض عيلبون في سهل البطوف. عن تفاصيل المجزرة حدثنا خليل حسين عوض الشواهدة - أبو إبراهيم (82 سنة):

عشيرة المواسي كانت ساكني في سهل البطوف. عدد أفراد العشيرة في منطقة الجليل وطبرية وصفد كان حوالي 2000 نفر. احنا كنا ساكنين ببيت شعر بالجبل الغربي. أنا كنت سارح بطرشنا بمنطقة أم الثنايا جنب البطوف. نزلت على السهل، واللا شفت واحد متخبي وراء السرّيسة، اسمه سعد محمد ذيب من عرب المواسي، سألته شو صار؟ قال: اليهود طخوا 16 واحد من العشيرة، قتلوا 14 وأنا ومعجّل العطية ما متنا بس إنجرحنا. لما حسّوا علينا انه ما متنا رجعوا مرة ثانية، طخوا معجل بين عيونه ومات. أنا أجت الرصاصة فوق راسي، قال الجندي لازم تموت. حط البارودة بثمّي وطخني، طلعت الرصاصة من جنب ثمّي بس ظليتني عايش.

طلب مني أحمله. قلت له ما بقدر أحملك، مع إنه كنت شاب. وبعد ما رحت، أجت واحدة اسمها زهيَّة الفواز، وحملته على ظهرها، وبعدين جابت حمار وحملته عليه وخبّته بمغارة بجبل الميس، صارت توخذ له أكل وتطعمه، عرفوا الهجناه بالموضوع وإنه واحد سلم منهم، وعرفوا من الناس عن زهية، سألوها الهجناه عن الشخص اللي كان عايش قالت لهم أجت امّه وأخذته على سوريا، ولكن هو كان بعده بالمغارة. بعد فترة أجت أمه فعلاً وأخذته على سوريا. وظل عايش، وبعث لزهيّة سلام من سوريا بالراديو.

أنا وأخوي محمد وابن إسماعيل الحسين قبرنا ضحايا المواسي. كانوا صف واحد، إشي واقع هيك وإشي واقع هيك، مطخوخين من قدام. حطينا الجثث بمغارة بخربة عين الناطف جنب البطوف. ولما أجت شركة مكوروت بعد سنين وحفروا قناة الميّ، نقلنا العظام لمغارة ثانية. وبعد فترة لما صار عندنا مقبرة بعيلبون جبنا عظامهم وقبرناهم فيها. كنت أعرف المقتولين كلهم: عطيّة ومعجل ومقبل وصالح هدول من عائلة ارشيد، سعيد واسعد القاسم، باير ومحمود طه، حسين أحمد، حسن وحش،