لك 360 ضفيرة يعجبو العايقين،
لقيتلك لقية عجيبة تدهش الغايبين.
فآسيا قالتلو: إيه هيه يا عدو الله يا ظالم؟
فشاور لها فرعون وقال: أهي واقفة في المية مرمية.
انزلي وهاتيها.
وكان للبحر 80 سلم، نزلت الست آسيا لحد ما حصلت الصندوق، وفجت عليه الريحة من الصندوق، كيف العطر والمسك.
فبشرت بالماء وقالت: ما أنت؟ ما أنت؟ ما أنت؟
فسمعت لغة في ودنها بيقوللها: أنا صاحب الحفلة اللي إنتي تعلمي بيها.
لا يخفيك شوري ولا قولي.
أنا موسى.
فرفعته على صدرها شجيعة؛
لأنها كانت صاحبة قوة ومليحة.
رفعت آسيا الصندوق وقالت: «يا فرعون احذر من الأمانة دي، دي أمانة حلوة قوي.»
وكان فرعون متجوز ست تانية غير ستنا آسيا، وكان مخلف منها بنية سنها سبع سنين، وكانت عاجزة رجلين وإدين، ومبلية بالبراص.
ولما جابو الصندوق وفتحوه قدام البنت بقدرة قادر زال عنها البراص، وصبحت سليمة، على وش الطفل الصغير.
ولما شافت آسيا إن البراص زال عن البنت، قالت لفرعون: يا ظالم إنت جمعت كل الأطبة،
حتى اللي دار دار،
لم شفوها ولم بروها،
وعلى الوجه المليح اتبرت بنتك.
فرعون قاللها: ما رأيك يا آسيا أحلى من دا ظلام.
أنا ادتهلك يا آسيا وأنتي تفكري بهذا الكلام.
آسيا قالتلو: نهار عيد ساعة أشوف دا ابني.
بس مفيش غدا (غداء) في صدري ينفعلو.
قاللها: أمال المدله عندك.
قالتلو: أحضر لي جميع المراضع،
اللي يشرب منها تستنه عندنا.
ولما يشرب وينام تروح وتصبح عندنا.
بعتوا لجميع المراضع جابوها،
اتعرض على كل المراضع ما قبل منهم.
آسيا قالتلو: الولد مش قابل حد.
فرعون قاللها: قصي الملك كله ما تخلي منه حد. •••
آخر سنة جت الأميرة أمه،
بعتوا جابوها.
قالت أم موسى: يا دمع عيني اختشي،
ما ينزل منك شيء،
ويا نهر اجري في صدري.
راحوا العرب من قبل مني،
عزموا العرب بغذاهم،
ما قبل منهم شيء،
جينا لوقت الحق،
إلهي يا رب ما تكسفني،
وعدتني وفيت طلبك،
وآديني جيت لك. •••
نظر فرعون بعينه لقي الولد مش قابل بز أي مخلوقة على وجه الأرض، فقال لآسيا: أمال حانسقيه منين المشيطن ده.
آسيا قالتلو: صلي صلي صلي،
دا وهبة من الله،
وجت ع الأرض.
فرعون قاللها: ما احنا قدمنالو كل المراضع،
مش قابل ولا واحدة،
جت ع الأرض.
آسيا قالتلو: فيه ست برا آخر التصافي،
إن ما قبلش بزتها،
يبقى لنا تصاريف في الأرض. •••
أول ما دخلت العزيزة أمه،
رفع بعينه وعاز يقوم ع الأرض. •••
جريت بنت فرعون اللي كانت مريضة،
راقدة في الأرض.
يا ست الغلام،
وسلمته لأمه.
تشهد بذلك ملائكة الأرض،
جر من بز أمه في أمان الله.
ضحكت آسيا وقالت: يا ما أنت كريم يا رب،
أتانا الخبر من عندك،
وإنت اللي عالم يا رب.
راحت لفرعون وقالتلو: مبروك.
قبلت العناية من عند رب البرايا،
الفرحة تمت وبان الهداية. •••
فرعون ملهي في بنته،
ولا يعلم إن دا موسى ابن عمران،
لكن آسيا تعلم وحق الواحد الجبار.
قالت آسيا: يا رب تنتقملي من الظالم فرعون،
ويجعل عمرك طويل يا موسى يا ابن عمران،
قعدت في هنا وعدل.
فرعون قاللها: إنتي تنامي على كل الدلع والهنا،
وتحرص ع الغلام روح العز والعنا.
قالت بنت فرعون: يابا أنا أقدرش أنام،
إلا جار الطفل بس،
يحلالي المنام بابا وانجلى.
ريحته ذكية يابا،
ومنه القلب ينجلي.
ولما الفجر بيحوم،
ألقاه قاعد جاري يصحيني،
يضحك معايا يابا،
واعي وبيسليني،
وعلى كل حاجه يوريني.
قام فرعون بنفسه شال الولد حبه،
أيم الولد بإيده اليمين لدقن فرعون،
وهبش خصلة من الشعر طلعها بالدم،
وكان الولد عنده من السن سبع سنين.
صرخ فرعون في آسيا وقاللها: الحقي يا آسيا غيتيني، دا موسى ابن عمران.
آسيا قالتلو: تعرض عليه الجمرة والتمرة.
وراحت آسيا لبست واتزينت وبلغت فرعون وقالتلو: تتشطر على غلام آسيا مربياه،
عشان ما انت ليك ست بالمستقر،
لها بنيه تجوز الملك كله وحديها.