احتل لواء جولاني قرية عيلبون في 30 تشرين الأول 1948 ورفع سكان القرية الأعلام البيضاء، وعندما دخل الجنود استقبلهم خوري القرية وأعلن رجال الدين في القرية عن استسلام قريتهم. عن هذا اليوم وعن إعدام اثني عشر شابا من القرية حدثنا أبو عاطف قائلاً:

تجمعت الزلام والنسوان والأولاد بالكنسية، والعجّز بقيوا بالبيوت. دخل الجيش علينا وأطلعونا من الكنيسة وطخّوا علينا حتى يخوفونا. كان معنا واحد اسمه عازر مسلم، هذا عازر كان من حوران، كان أسمر ويشتغل بالبلد. عازر انقتل وكان هو أول قتيل بالبلد. لما أطلعونا من الكنسية، جمعونا بالحارة. هاي الحارة كانت عبارة عن ساحة صغيرة بنص البلد وكان أهل البلد يستعملوها للحفلات والأعراس، وكان رجال القرية يلتقوا فيها كل يوم أحد قبل توجههم للكنسية. كل الناس قعدت على الأرض ورفعت إيديها وأنا كنت معهم. الجيش أختار 12 شاب. أخوي ميلاد كان من بين الشباب اللي اختاروهم، كان عمره 21 - 22 سنة، وكان وقتها يشتغل بالقدس عند حاكم اللوا الانجليزي، باقي الشباب كان اسمهم نعيم غنطوس زريق، حنا ابراهيم أشقر، فؤاد نوفل، بديع زريق، جريس شبلي- أخوه ليوسف شبلي اللي كان يلف مع جيش الانقاذ- وفضل العيلبوني، ومحمد خالد اسعد، عبدالله شوفاني، رجا ميخائيل خليل، زكي اسكافي وميخائيل شامي. بعد ما اختاروا الشباب، طلبوا من الناس انها ترحل على المغار وطلبوا انهم يمشوا قدام سيارات الجيش اللي رافقتهم، لأنهم خافوا يكون في الغام في الطريق. بقي ببلدنا حوالي عشر ختياريه وخوارنة اثنين، منهم الخوري مرقس.

بطرس شكري إلياس متى (83 سنة)، كان شاهداً على المجزرة ولم يرحل مع أهل القرية: